Contents -BIBLIOGRAPHIC RECORD

William Stanley Braithwaite, ed. The Book of Restoration Verse. 1910.

Clerk Saunders

Anonymous

CLERK SAUNDERS and may Margaret

Walk’d owre yon garden green;

And sad and heavy was the love

That fell thir twa between.

‘A bed, a bed,’ Clerk Saunders said,

‘A bed for you and me!’

‘Fye na, fye na,’ said may Margaret,

‘Till anes we married be!’

For in may come my seven bauld brothers,

Wi’ torches burning bright;

They’ll say,—‘We hae but ae sister,

And behold she’s wi’ a knight!’

‘Then take the sword frae my scabbard,

And slowly lift the pin;

And you may swear, and save your aith,

Ye ne’er let Clerk Saunders in.

‘Take you a napkin in your hand,

And tie up baith your bonnie e’en,

And you may swear, and save your aith,

Ye saw me na since late yestreen.’

It was about the midnight hour,

When they asleep were laid,

When in and came her seven brothers,

Wi’ torches burning red.

When in and came her seven brothers,

Wi’ torches burning bright:

They said, ‘We hae but ae sister,

And behold her lying with a knight!’

Then out and spake the first o’ them,

‘I bear the sword shall gar him die,’

And out and spake the second o’ them,

‘His father has nae mair but he.’

And out and spake the third o’ them,

‘I wot that they are lovers dear.’

And out and spake the fourth o’ them,

‘They hae been in love this mony a year.’

Then out and spake the fifth o’ them,

‘It were great sin true love to twain.’

And out and spake the sixth o’ them,

‘It were shame to slay a sleeping man.’

Then up and gat the seventh o’ them,

And never a word spake he;

But he has striped his bright brown brand

Out through Clerk Saunders’ fair bodye.

Clerk Saunders he started, and Marg’ret she turn’d

Into his arms as asleep she lay;

And sad and silent was the night

That was atween thir twae.

And they lay still, and sleepit sound,

Albeit the sun began to sheen;

She look’d atween her and the wa

And dull and drowsie were his e’en.

Then in and came her father dear;

Said, ‘Let a’ your mourning be;

I’ll carry the dead corpse to the clay,

And I’ll come back and comfort thee.’

‘Comfort weel your seven sons,

For comforted I will never be:

I ween ’twas neither knave nor loon

Was in the bower last night wi’ me.’

The clinking bell gaed through the town,

To carry the dead corse to the clay;

And Clerk Saunders stood at may Marg’ret’s window,

I wot, an hour before the day.

‘Are ye sleeping, Marg’ret?’ he says,

‘Or are ye walking presentlie?

Give me my faith and troth again,

I wot, true love, I gied to thee.’

‘Your faith and troth ye sall never get,

Nor our true love sall never twin,

Until ye come within my bower,

And kiss me cheik and chin.’

‘My mouth it is full cold, Marg’ret;

It has the smell, now, of the ground;

And if I kiss thy comely mouth,

Thy days of life will not be lang.

‘O cocks are crowing a merry midnight;

I wot the wild fowls are boding day;

Give me my faith and troth again,

And let me fare me on my way.’

‘Thy faith and troth thou sall na get,

And our true love sall never twin,

Until ye tell what comes o’ women,

I wot, who die in strong traivelling?’

‘Their beds are made in the heavens high,

Down at the foot of our good Lord’s knee,

Weel set about wi’ gillyflowers;

I wot, sweet company for to see.

‘O cocks are crowing a merry midnight;

I wot the wild fowls are boding day;

The psalms of heaven will soon be sung,

And I, ere now, will be miss’d away.’

Then she has taken a crystal wand,

And she has stroken her troth thereon;

She has given it him out at the shot-window,

Wi’ mony a sad sigh and heavy groan.

‘I thank ye, Marg’ret; I thank ye, Marg’ret;

And ay I thank ye heartilie;

Gin ever the dead come for the quick,

Be sure, Marg’ret, I’ll come for thee.’

It’s hosen and shoon, and gown alone,

She climb’d the wall, and follow’d him,

Until she came to the green forest,

And there she lost the sight o’ him.

‘Is there ony room at your head, Saunders?

Is there ony room at your feet?

Or ony room at your side, Saunders,

Where fain, fain, I wad sleep?’

‘There’s nae room at my head, Marg’ret,

There’s nae room at my feet;

My bed it is fu’ lowly now,

Amang the hungry worms I sleep.

‘Cauld mould is my covering now,

But and my winding-sheet;

The dew it falls nae sooner down

Than my resting-place is weet.

‘But plait a wand o’ bonny birk,

And lay it on my breast;

And shed a tear upon my grave,

And wish my saul gude rest.

‘And fair Marg’ret, and rare Marg’ret,

And Marg’ret, o’ veritie,

Gin ere ye love another man,

Ne’er love him as ye did me.’

Then up and crew the milk-white cock,

And up and crew the gray;

Her lover vanish’d in the air,

And she gaed weeping away.