dots-menu
×

Home  »  Parnassus  »  Smith’s Scottish Minstrelsy

Ralph Waldo Emerson, comp. (1803–1882). Parnassus: An Anthology of Poetry. 1880.

Glenlogie

Smith’s Scottish Minstrelsy

THREE score o’ nobles rade up the king’s ha’,

But bonnie Glenlogie’s the flower o’ them a’,

Wi’ his milk-white steed and his bonnie black e’e,

“Glenlogie, dear mither, Glenlogie for me!”

“O haud your tongue, daughter, ye’ll get better than he;”

“O say nae sae, mither, for that canna be;

Though Doumlie is richer, and greater than he,

Yet if I maun tak him, I’ll certainly dee.

“Where will I get a bonnie boy, to win hose and shoon,

Will gae to Glenlogie, and come again soon?”

“O here am I a bonnie boy, to win hose and shoon,

Will gae to Glenlogie and come again soon.”

When he gaed to Glenlogie, ’twas “wash and go dine;”

’Twas “wash ye, my pretty boy, wash and go dine,”

“O ’twas ne’er my father’s fashion, and it ne’er shall be mine

To gar a lady’s hasty errand wait till I dine.”

“But there is, Glenlogie, a letter for thee;”

The first line that he read, a low smile gave he,

The next line that he read, the tear blindit his e’e;

But the last line that he read, he gart the table flee.

“Gar saddle the black horse, gar saddle the brown;

Gar saddle the swiftest steed e’er rade frae a town;”

But lang ere the horse was drawn and brought to the green,

O bonnie Glenlogie was twa mile his lane.

When he came to Glenfeldy’s door, little mirth was there;

Bonnie Jean’s mother was tearing her hair;

“Ye’re welcome, Glenlogie, ye’re welcome,” said she,

“Ye’re welcome, Glenlogie, your Jeanie to see.”

Pale and wan was she, when Glenlogie gaed ben,

But red and rosy grew she, whene’er he sat down;

She turned awa’ her head, but the smile was in her e’e,

“O binna feared, mither, I’ll maybe no dee.”