dots-menu
×

Home  »  Women Poets of the Nineteenth Century  »  Carolina, Lady Nairne (1766–1845)

Alfred H. Miles, ed. Women Poets of the Nineteenth Century. 1907.

By Songs. V. Huntingtower

Carolina, Lady Nairne (1766–1845)

“WHEN ye gang awa’, Jamie,

When ye gang awa’, laddie,

What will ye gi’e my heart to cheer,

When ye are far awa’, Jamie?”

“I’ll gi’e ye a braw new goun, Jeanie,

I’ll gi’e ye a braw new goun, lassie,

An’ it will be a silken ane,

Wi’ Valenciennes trimm’d round, Jeanie.”

“O, that’s nae luve at a’, laddie,

That’s nae luve at a’, Jamie;

How could I bear braw gouns to wear,

When ye are far awa’, laddie!

“But mind me when awa’, Jamie,

Mind me when awa’, laddie,

For out o’ sicht is out o’ mind

Wi’ mony folk, we ken, Jamie.”

“Oh, that can never be, Jeanie,

Forgot ye ne’er can be, lassie;

Oh gang wi’ me to the north countrie,

My bonny bride to be, Jeanie.

“The hills are grand and hie, Jeanie,

The burnies rinnin’ clear, lassie,

’Mang birks and braes, where the wild deer strays

Oh cum wi’ me and see, lassie.”

“I winna gang wi’ thee, laddie,

I tell’t ye sae afore, Jamie;

Till free consent my parents gi’e,

I canna gang wi’ thee, Jamie.”

“But when ye’re wed to me, Jeanie,

Then they will forgi’e, lassie;

How can ye be sae cauld to me,

Wha’s lo’ed ye weel and lang, lassie?”

“No sae lang as them, laddie,

No sae lang as them, Jamie;

A grief to them I wadna be,

No for the Duke himsel’, Jamie.

“We’ll save our penny fee, laddie,

To keep frae poortith free, Jamie;

An’ then their blessing they will gi’e,

Baith to you an’ me, Jamie.”

“Huntingtower is mine, lassie,

Huntingtower is mine, Jeanie;

Huntingtower, an’ Blairnagower,

An’ a’ that’s mine is thine, Jeanie!”