| Heathcote William Garrod, comp. (1878–1960). The Oxford Book of Latin Verse. 1912. |
| |
| The Ass in the Lion’s Skin |
| | | Avianus (circa 400 A.D. (?)) |
| |
| |
| METIRI se quemque decet propriisque iuuari | |
| laudibus, alterius nec bona ferre sibi, | |
| ne detracta grauem faciant miracula risum, | |
| coeperit in solitis cum remanere modis. | |
| exuuias asinus defuncti forte leonis | 5 |
| repperit et spoliis induit ora nouis. | |
| aptauitque suis incongrua tegmina membris | |
| et miserum tanto pressit honore caput. | |
| ast ubi terribilis mimo circumstetit horror | |
| pigraque praesumptus uenit in ossa uigor, | 10 |
| mitibus ille feris communia pabula calcans | |
| turbabat pauidas per sua rura boues. | |
| rusticus hunc magna postquam deprendit ab aure, | |
| correptum stimulis uerberibusque domat; | |
| et simul abstracto denudans corpora tergo | 15 |
| increpat his miserum uocibus ille pecus; | |
| ‘forsitan ignotos imitato murmure fallas; | |
| at mihi, qui quondam, semper asellus eris.’ | |
| |
|
|
|
