| Heathcote William Garrod, comp. (1878–1960). The Oxford Book of Latin Verse. 1912. |
| |
| Fatal Beauty |
| | | Seneca, the younger (c.3 B.C.–A.D. 65) |
| |
| |
| ANCEPS forma bonum mortalibus, | |
| exigui donum breue temporis, | |
| ut uelox celeri pede laberis! | |
| Non sic prata nouo uere decentia | |
| aestatis calidae despoliat uapor, | 5 |
| saeuit solstitio cum medius dies | |
| et noctes breuibus praecipitant rotis | |
| languescunt folio et lilia pallido: | |
| ut gratae capiti deficiunt comae | |
| et fulgor teneris qui radiat genis | 10 |
| momento rapitur nullaque non dies | |
| formonsi spolium corporis abstulit. | |
| res est forma fugax: quis sapiens bono | |
| confidat fragili? dum licet, utere. | |
| tempus te tacitum subruit, horaque | 15 |
| semper praeterita deterior subit. | |
| Quid deserta petis? tutior auiis | |
| non est forma locis: te nemore abdito | |
| cum Titan medium constituit diem, | |
| cingent turba licens Naides improbae, | 20 |
| formonsos solitae claudere fontibus, | |
| et somnis facient insidias tuis | |
| Panas quae Dryades montiuagos petunt. | |
| |
|
|
|
